要聞港聞

槍林彈雨慶回歸 治安不靖慘悽悽

今年係香港回歸25周年,可惜受疫情影響,5年一度嘅「回歸煙花匯演」亦已宣告取消。之不過,雖然無煙花匯演,香港依然被一陣火藥味籠罩,皆因日前喺「人間妖域」蘭桂坊附近,上演黑幫南亞兵團大火併嘅時候,竟然有南亞佬拔槍開火;唔止㗎,就喺中環槍擊案嘅案發同一日,喺長沙灣通州街西九龍法院,又有人因為藏有仿製槍械被捕。香港治安立立亂都唔係一朝一夕嘅事,之但係家吓經已唔能夠用「刀光劍影」去形容,直頭係槍林彈雨,搞到市民出街都提心吊膽,驚死隨時中流彈!
舊陣時香港嘅治安無論幾差都好,就算市民落街咁唔好彩遇上黑幫劈友,起碼都可以靠兩隻腳逃走;依家啲黑幫郁啲就拔槍,市民點跑都快唔過粒子彈㗎喎!更何況,你估個個揸槍都係神槍手咩,10槍都唔知有冇一槍打得中目標,其他嗰9槍就變成流彈,一個唔好彩隨時命仔都冇埋!查實槍械問題失控有幾嚴重,大家睇吓位於太平洋另一端嘅美國就知,三日唔埋兩日就有一宗槍擊案,而且死嘅都係無辜市民;再睇墨西哥,啲黑幫毒販一傾唔掂數,就大街大巷擸槍火併;係咪要去到呢個地步,「忠誠勇毅」先肯做番啲嘢呢?
睇番今次呢單仿製手槍案,被捕男子本身因為藏毒,當日要到西九龍法院處理緩刑事宜;好彩法院有安檢,保安及時透過X光機發現嗰支仿製槍,否則後果不堪設想。咁都唔算恐怖,警方事後喺被捕男子嘅家中,起獲多12支仿製槍械、反政府海報同埋抗議裝備,而最恐怖嘅係,警方話唔排除被捕人士係槍迷!大哥,啲抗議裝備唔通係事後留嚟紀念咩,梗係事前做準備㗎啦;7‧1臨近,仲傳緊可能有國家領導人訪港,好惹人遐想啫!再講,就算係槍迷,都唔會癲到明知去法院都佗槍啦,真係想唱句︰「天才與白癡,你黐定佢黐!」
眾所周知,愈係臨近7‧1呢啲大日子,愈易有啲有心人出嚟搞事,想要破壞香港嘅安定繁榮!短短數日之內,先後破獲兩宗涉及槍械嘅案件,究竟係偶然巧合,抑或係有人精心籌劃,就算搞唔出咩襲擊,依然要港人膽戰心驚?最攞命嘅係,中環槍擊案中嘅真槍到依家都仲未搵番,估計仲有10多名涉案疑犯未被捕,成單案冇晒下文咁,市民又點會唔驚!鬧市槍聲隆隆,港府卻一反常態鴉雀無聲,高官連出嚟開官腔穩定民心都懶得做,係咪想大事化小,凡涉及黑幫都不了了之?話說之前有個屎塔蓋犯禁聚令,有晒證據但至今都冇下文,唔通呢啲先係新常態?
想香港實現安定繁榮,搞好治安係關鍵!除咗要懲治黑暴,同樣要懲治黑惡分子。勿以惡小而為之,勿以善小而不為,唔好以為偶然一宗半宗槍擊案就唔嚴重,冰山浮出水面嘅永遠只係一角,邊個知有幾多黑槍已流入本港。警方此時唔出手,又要等中央出手拯救嗎?
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500