政情：長期墊司底 鄭若驊民望史上最曳

香港民研喺網上公布本月啟動一國兩制25周年中期民情總結，首星期先整理2002年至今的問責官員民望數據。不單止鄭若驊嘅支持率極低，民望排尾二同尾三嘅係前特首董建華同梁振英，兩人出任特首期間嘅支持率淨值分別為負37個百分點同負33個百分點。

喺司、局長方面，教育局前局長吳克儉同梁振英並排，吳嘅支持率淨值都係負33個百分點，而任期只剩3星期嘅現屆特首林鄭月娥緊隨其後，支持率淨值負32個百分點；財政司司長陳茂波喺上屆出任發展局局長期間，支持率淨值亦負31個百分點；民政事務局前局長劉江華的支持率淨值是負24個百分點；現任教育局局長楊潤雄負23個百分點；前政務司司長林瑞麟是負22個百分點，而現任財政司司長嘅陳茂波，支持率淨值係負19個百分點。

老實講，外界不斷鬧爆鄭若驊不稱職兼敷衍塞責。正如佢上任律政司司長，就被爆僭建醜聞，而喺在任期間律政司檢控工作頻頻甩漏，律政司內部竟然有人出埋「黑暴秘笈」，反映內部立立亂，根本係佢管理不善，就連2019年港府修訂《逃犯條例》令本港社會出現連場衝突，至今已有逾萬人被捕，而唔少案件更積壓至2023年始開審。有學者更批評律政司應變能力低，檢控速度又「慢九拍」，情況不理想，擔心會因此令不法之徒以為犯法毋須負責，直指鄭若驊責無旁貸。

外界一直有聲音要求鄭退位讓賢，甚至問責下台，有學者更曾直斥佢厚面皮、賴死唔走。面對任期只剩3個星期，佢日前出席電視節目時被問到會唔會留任，佢以「不置可否」嚟回應，又拒絕評價自己過去5年嘅工作表現，僅稱自己與同事都盡心工作。個底都花晒喇！佢仲點敢攞張成績表出嚟獻醜呀！