昔日東方政情：為招聘會變裝 梁子穎扮占士邦
宣傳要做到街知巷聞，難免要搞下噱頭。有工會近日發放短片，一名西裝筆挺嘅男士架上墨鏡，手持水槍作狀射擊，唸唸有詞「招、招」連聲，一睇就知係扮演風流倜儻嘅占士邦，之不過效果就好詼諧、好滑稽，令人忍俊不禁。至於演員係邊個？佢咪係勞工界議員梁子穎囉！
喺片中「招、招」聲
點解梁子穎要扮占士邦呢？原來佢所屬嘅工會將於明天舉辦招聘會，而作為工會培訓就業大使嘅梁子穎，拍片宣傳就走唔甩啦。而佢之所以喺片中「招、招」聲，因為後面要接住「聘、聘」呀！仲話招聘會當日約定你添！
雖則話本港失業率高企，但職場上仍有唔少空缺，尤其係疫情趨緩嘅當下，過去停業一段時間嘅行業如飲食同零售等，都打算請番啲員工以應付復業嘅需求，而招聘會當日就會提供逾1,500個職位空缺。到底梁子穎粉墨登場拍宣傳片有無效呢？明天招聘會就有答案。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
