政情：靠分選科配對欠準 職場教育與時並進

陳龔偉瑩尋日喺一個電台節目中提到香港嘅堅尼系數，由2008年嘅0.434升到依家嘅最新數字0.537，反映香港貧富懸殊問題十分嚴重。而根據2020年香港貧窮情況報告，貧窮兒童人口有增無減，喺政府政策介入前更高達27萬人，即每4名18歲以下兒童就有1個是貧窮兒童。

佢話基層父母經濟能力差，難以向下一代提供優質教育資源，家庭亦缺乏社會同職場嘅人脈，限制咗子女嘅視野同社會接觸面；而貧窮青少年則普遍自信心不足，職場嘅知識同觸覺亦相對缺乏，阻礙向上流動嘅能力，形成跨代貧窮嘅惡性循環。

要解決跨代貧窮問題，幫助年輕人開闢向上流動嘅能力同機會，無疑係至關重要。但佢又指現時嘅應試式教育，未能有效發掘年輕人嘅潛能同興趣，好容易胡亂選擇學科及職業，並因分數而決定選科，最後進入一啲無興趣嘅行業，白白浪費才華之餘，更不利佢哋向上流動，而社會最終亦因此而蒙受損失。

佢認為只有通過系統性嘅職場教育，至可以幫助年輕人有能力及信心應對未來嘅挑戰，長遠脫貧，社會先至會受益。其實現今嘅世界急速發展，行業不斷更替、變得多元，各行各業之間亦會互動創新，發展真係一日千里，佢主張要一套有系統嘅扶育同規模嘅職場教育過程，予年輕人到實際職場體驗嘅機會，及早認識社會、接觸商界、建立人脈同鍛煉職場嘅軟實力，啟發自己嘅興趣同提升潛能，從而作出適當嘅職涯選擇，使香港不致落後於世界經濟發展嘅洪流。

陳龔偉瑩重申，係時候重新思考教育嘅本質，喺學術教育嘅同時，亦要重視職場教育，與時並進。佢又期望新一屆政府，能夠盡快落實解決跨代脫貧嘅政策，精準投放寶貴嘅社會資源，以幫助年輕人以向上流動為目的，達到脫貧嘅結果。