昔日東方政情：迴避肝癌篩查 食衞局推莊捱罵
要減少病痛，幾時都係「預防勝於治療」。鑑於肝臟係人體重要器官，病變初期往往無徵兆，只有及早篩查先至可以避免病情惡化，議員田北辰喺尋日嘅立法會衞生事務委員會上詢問當局，會否透過公私營合作推行「肝癌篩查計劃」，結果就換來官腔答覆，令佢大為氣結，直斥係「推莊」咁話。
田北辰轟答非所問
田北辰指政府一直都話要扭轉現時「重治療，輕預防」嘅醫療體制同觀念，並分別推行「大腸癌篩查計劃」同 「乳癌篩查先導計劃」，至於死亡率排喺大腸癌同乳癌之間嘅肝癌，政府又有無打算參考現有嘅篩查計劃，透過公私營合作推行「肝癌篩查計劃」，同時為當中高危群組進行定期監察？出席會議嘅食物及衞生局局長陳肇始回應話，當局有專責嘅委員會負責癌症篩查事宜，並會參考各地數據，再決定篩查應該係點推出、同埋相關嘅幅度。
對於陳嘅回應，田非常不滿，指對方答非所問，話大腸癌同乳癌都有篩查計劃，點解肝癌就冇呢？田話據佢所知，香港鄰近地區，譬如日本約有62%嘅肝癌個案能夠係初期被發現，香港依家只得21%，個數字差天共地，形容呢個「推莊」簡直離晒大譜啊！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
