政情：部門偷步開7首長位 陳克勤：不君子行為

環境局今次開位嘅理由，係指改組為「環境及生態局」之後，就要接手某啲原屬其他政策局嘅職能，如環境衞生及漁農等，工作範圍同複雜性勢必有所提升，而當中所涉及嘅人手，即使局方盡量內部調配，但仍有必要開設新職位。

陳克勤就質疑局方喺處理今次議題方面，並無按立法會一貫嘅程序去處理。佢提到，根據政府文件表示，今年2月10日已就環境局重組建議諮詢環境事務委員會，內容包括開設多個首長級職位，當時委員普遍支持建議。但事實上，環境事務委員會主席葛珮帆話當日嘅會議係討論施政報告嘅政策方向，而佢亦好認真咁睇番當日嘅會議，只有簡慧敏議員提問過架構重組，但政府並無具體回答，亦無講過話要開7個職位、一年人工要成1,500萬、連埋福利開支就要2,300多萬元！

陳指出，當局將有關職位開支「攝」咗入去施政報告嘅做法，係不君子行為，批評政府當局用一個咁嘅態度去對待行政立法關係，佢不但非常失望，更反問此舉是否「良政善治」？跟住佢就話想聽吓政府解釋，點解唔正正經經咁喺事務委員會裏面提出，反而唔跟程序偷步開位。

就偷步開位嘅指控，黃錦星話今次涉及整體政府架構重組，係一個比較特殊嘅情況，希望議員能夠特殊處理，黃話希望大家可以理解，環境局變咗環境及生態局，工作量將會愈來愈大，況且氣候變化、減廢回收等，都要抓緊時間盡快去做。黃話同下一屆特首辦公室聯繫過，希望新一屆政府嘅人事班子可以早啲就位，令到新嘅政府開局更加好。

黃錦星嘅解釋，陳話難以信服。佢指出，由2月到依家，期間雖因疫情而停過會，然而4個月咁長嘅時間，點解當局唔過嚟講呢？陳又話幾十頁文件裏面，得一句話2月10日曾討論有關建議，但事實上當日並無傾過，況且喺程序、處事方法，當局都唔恰當，陳又踢爆環境局曾多次使用類似嘅手法，去迫使議會通過某啲撥款，話「大家心水清就不妨去諗吓，我亦無謂喺呢度講得咁難聽。」

陳跟住就話，唔會參與尋日餘下嘅討論，因為佢覺得局方並唔尊重議會，亦都唔尊重佢個人。當陳離場抗議之時，再向委員會主席葉劉淑儀提出，話即使人事編制小組通過建議，日後都要喺財委會再作討論。