政情：架構重組狄志遠反對冇人肯跟隊

指增設副司長使費大財會表決前圖再討論

下屆政府喺7月1日就會落實增設3名副司長同埋3司15局嘅架構重組方案，當中涉及新增開支9,500萬元。開位建議早前已討論完，會交畀財務委員會表決，但社福界議員狄志遠就要求財會議而再決，但係冇其他議員肯「埋堆」，湊唔夠數冇得傾嘞！明明之前有個別議員都傾向財委會再傾㗎，點解轉軚呢？財委會主席陳健波就笑言，係人心嘅轉變喎。係咪呀？抑或建制派唔想幫人抬轎，兼且驚畀人鬧阻頭阻勢呀？

話說人事編制小組委員會早前通過開位建議後，狄志遠隨即去信財委會主席陳健波，要求財委會喺下次嘅會議能夠進一步討論政府重組架構撥款。但截至前日，只得佢一個人提出，即使某啲黨派曾贊成再討論，但最終轉軚。冇人「埋堆」，無法達到3名議員嘅門檻，即係唔可以推翻人事編制委員會交付財委會唔使討論就表決申請嘅建議，唔可以重新討論政府開位嘅建議。

有黨派一度認同之後又轉軚

其實，狄早就反對增設3名副司長，話工作唔清晰，又話涉及大量公帑支出，於是日前去信陳健波，要求將副司長同相關辦公室人力嘅撥款分開表決。但據知陳曾詢問政府，當局唔同意安排，故不能分拆投票，所以佢會喺今日表決政府重組撥款申請時投反對票。

點解某啲政黨早前話認同狄，但後來又改變態度呢？陳健波笑言，係人心嘅轉變喎。不過陳又補充話，就算重組架構嘅人事編制早前已獲人事小組委員會通過，財委會毋須再討論，但有關9,500萬元嘅開位撥款，財委會之前並無討論過，而今日可以就架構重組嘅新增職位，同埋有關額外薪酬開支一併商討，料需時2至3小時。佢又預料財委會今日會通過立法會擴建嘅撥款申請。

架構重組方案涉及13名政治任命官員同57名公務員職位，隨着人事編制小組委員會早前傾完開位建議，財委會若喺今日順利過埋開位同撥款申請嘅話，下周三（15日）立法會再過埋相關決議案，咁就完成撥款同立法嘅程序。

老實講，政府之前都話趕喺任內完成立法程序，梗係想快刀斬亂麻過咗佢喇，又豈容節外生枝吖！