政情：油麻地戲院 怕天花受損 玩AR夢難圓

到底係邊種科技設施咁「重磅」？話說科技創新界議員邱達根喺會上表明支持有關項目，但建議局方同署方要使用多啲科技，事關油麻地戲院係一個唔錯嘅演示地方。

邱又話依家有啲導賞團都唔使搵個人喺度，應用3D影片都可以嘞。跟住佢就話見過有人使用AR，投影個人出嚟，如果用呢個方法嚟培訓青少年朋友，咁就唔使有個真正老倌企喺度教，往後可以省卻好多時間，更有可能做到高精準添。

邱達根所提到嘅AR，即係擴增實境，數年前風靡一時嘅手機遊戲「捉精靈」就係呢種科技嘅應用。出席會議嘅政府代表回應話，油麻地戲院擴建工程將會涉及提升科技，但主要係舞台上加設一啲燈光同影音方面嘅效果，以及添置寬頻上網嘅設施，冀協助製作團隊做即時轉播，亦可支援直播串流。但若果再複雜一啲，譬如話要支援AR等科技設施就唔得啦，原因係項目屬於歷史建築，要考慮埋戲院結構嘅負重量，如果再加一啲額外嘅設施，將加劇戲院天花嘅負荷，會構成安全隱患，況且增加任何設施，都會佔用舞台面積，對粵劇嘅舞台演出可能會有影響。

政府代表拒絕邱達根嘅提議，其理由是否充分，咁就要邱自己至知啦。就油麻地戲院擴建工程嘅討論，亦有議員提出較「貼地」嘅問題，譬如議員林振昇指項目完成後將吸引好多劇團或市民到場，但鄰近為交通擠塞路段，亦有好多私人樓宇，關注旅遊巴停泊及擠塞情況評估。當局回應話已顧及交通及人流需要，但礙於戲院嘅歷史因素，暫時未能提供泊車位置，但落客位則有幾個。議員江玉歡就指油麻地戲院擬於地庫增設4個廁所，擔心日後若24小時開放，將出現保安問題。當局回應話廁所會保持開放，同埋有保安人員駐守，此外亦有緊急召喚按扭，甚至研究加設閉路電視鏡頭。