政情：鬧過渡屋起得慢 鄭泳舜照嗌加碼

元朗同心村同江夏圍村兩個過渡性房屋項目，合共有4,000個單位。運輸及房屋局局長陳帆同副局長蘇偉文尋日就同小組委員會多名議員，一齊去咗呢兩個過渡性房屋參觀兼且探訪住戶，了解吓佢哋嘅生活情況。當然環境係比喺劏房好，生活條件有改善，但班議員唔單止關心住戶嘅居住情況，仲好關注過渡性房屋附近嘅配套同交通問題。

喺探訪結束後，鄭泳舜話過渡性房屋係解決劏房問題嘅重點之一，期望新一屆政府能夠重點解決劏房問題，雖然過渡性房屋暫時解決住屋嘅問題，但其他單位都要盡快落成，事關政府提出3年提供兩萬個過渡性房屋單位目標，依家只係約完成7,000幾個，期望其餘數目可加快進程。佢期望當局可繼續加快過渡性房屋嘅進度，要追落後達標，仲要繼續加碼到3萬至4萬個單位，以支援基層家庭，特別係劏房居民嘅需要。

睇吓依家嘅進度，3年提供兩萬個過渡性房屋單位目標，仲差1.3萬個，相信都有排追。咁邊度有地方可以再提供多兩萬個單位呢？曾經形容「房屋問題的確令人揪心」嘅陳帆真係要戙高床板諗計嘞！

喺下晝召開嘅房屋事務委員會會議上，亦有多名議員關注當局可唔可以提升建屋速度同增加數量。鄭泳舜話劏房居民身處水深火熱，促請當局審視加快興建進度同增加整體供應；另一議員梁文廣就建議當局將社區隔離設施改建成過渡性房屋。

蘇偉文回應話局方非常着緊建屋時間，相信累積更多項目經驗之後，能夠興建得快啲。佢又話，雖然政府定下兩萬個單位嘅目標，但已覓得可興建21,600個單位嘅土地，日後將研究點樣改建閒置校舍等，以增加供應，有待疫情緩和，先研究點樣改建社區隔離設施喎。

咁又係嘅，喺放寬社交距離之後，疫情反彈，近日確診個案上升，連學校都失守，有唔少學生「中招」，隨時又要開番啲隔離設施，點可以話改就改呀！