政情：選委界議員驚太離地 紛「孖頭」開地辦

話時話，以往功能界別嘅議員好少開地辦，事關佢哋只係向所屬嘅業界選民負責，而開地辦嘅都係孖住所屬政黨嘅區議員或有社區幹事，一來係為黨拓展地區版圖，二來係培養「新血」。但今屆新增嘅選委會界別擁有40席，佢哋嘅選民僅得約1,500人，但偏偏見到唔少議員開地辦。

例如九龍中地區直選嘅議員楊永杰近排就同選委會界別嘅議員吳傑莊「孖頭」，準備喺橫頭磡開多個地辦，預計本年內就會開張。佢話同吳本身就係好朋友，大家都想服務當區，另外立法會資源亦唔夠，「孖頭」可以減輕開支嘅壓力。

上屆係新界東直選議員，今屆轉跑道喺選委會界別當選嘅容海恩，早排亦同選委會界別嘅鄧飛喺將軍澳開咗地辦。佢話早前邀請鄧飛開地辦，認為雙方喺教育議題上可以互相幫助，加上鄧飛都係將軍澳香島中學校長，就地點而言都好方便。另一名選委會界別議員管浩鳴，就分別同港島東直選嘅梁熙同港島西直選嘅陳學鋒「孖頭」開地辦，話都係傾傾吓大家不約而同，加上佢本身都比較熟悉港島嘅區情咁話。

九龍東直選議員鄧家彪就同選委會界別嘅江玉歡喺翠屏邨開地辦喎。點解唔搵工會嘅人「孖頭」呢？鄧回覆話雖則兩人只係認識6個月，但之前議員議案上大家互相幫忙，江嘅律師身份亦可以幫補自己對法律嘅不熟悉。其實江早前喺何文田已經開咗一個地辦，仲預告合共會開5個地辦同一個聯絡處添！

講開聯絡處，選委會界別嘅馬逢國竟然山長水遠喺大澳開咗個聯絡處，仲話期待未來為大嶼山南地區注入更多文化項目，讓香港特色文化得以保存同推廣，令香港進一步成為中外文化藝術交流中心。可能同佢上屆係體育、演藝、文化及出版界議員有關。

點解選委會界別嘅議員要四出開地辦？聽聞係被要求嘅，雖然唔係強制性嘅，目的係避免佢哋冇接觸市民而太離地。咁當然佢哋同有地區經驗嘅議員「孖頭」就最方便啦，但會唔會只係形式主義，難有實際效用呢？就要拭目以待喇！