政情：宣誓存疑須解畫 姚鈞豪終作罷

其實姚喺宣誓當日，就表明唔會回覆，自言打定輸數，將被取消區議員資格（DQ）。姚尋日表示，回覆期限為下晝5點，但佢都決定唔會回覆，話預料民政局稍後會再發信畀佢。至於姚嘅議員辦事處亦會張貼告示，指佢喺區議會所跟進嘅事項將會交畀區議員何偉霖處理，而自己仍會繼續同政府部門跟進民生議題。姚又話街坊喺網上了解到事件，明白佢嘅情況。

姚鈞豪前年3月於大埔挑釁及用雷射筆照射便衣警，被控參與非法集結、無牌管有無線通訊器具等罪名，去年8月下旬被判處監禁3個月。當局曾安排姚喺獄中宣誓，但隨後取消。對於獲安排日前宣誓，形容「要嚟嘅始終要嚟」，又稱不預測宣誓結果。