政情：詐騙短訊太逼真符碧珍變受害人

幫手交「速遞費」唔見成萬蚊

詐騙手法層出不窮，令人防不勝防，觀塘區議員符碧珍為幫街坊，反而跌入不法之徒所設嘅陷阱。事緣一位區內街坊出示短訊向符求助，希望幫忙碌卡支付速遞費，佢不虞有詐答應幫手，但萬料不到竟是假冒速遞公司嘅詐騙短訊，遭騙徒盜用信用卡捲走逾萬元，結果好心卻招來損失。佢慨嘆現時詐騙短訊實在太逼真，稍不留神就誤墮騙局。

騙案係發生於上月14日，符碧珍如常返回辦公室工作，至中午11時許，一位婆婆向佢求助，指收到速遞公司送遞包裹嘅手機短訊，並附上連結支付派遞費用。婆婆又表示自己確實正等候從內地送港嘅包裹，但自己冇信用卡，未能支付派遞費用，希望符幫忙碌卡。

符碧珍見婆婆係區內老街坊，於是佢就按連結登入網站填寫資料，並以自己嘅信用卡支付12.47元嘅派遞費用。跟住婆婆就即場畀佢20元現金，符就找番8元畀對方。但點知轉頭，符竟然收到銀行嘅手機短訊，指信用卡支付咗約1,344歐元，大約相等於11,300港元。

未知銀行能否取消報警處理

符大感驚訝，相信自己墮入騙局，即時致電銀行了解情況，而銀行雖知悉事件，但能否成功取消有關付款，就要過段日子先至有回覆。符又話，婆婆知道佢遭騙去款項，大感歉疚，符反而要安撫番對方，話損失數額尚算可承受範圍，然後一齊去警署報案。符慨嘆冒充速遞公司嘅詐騙短訊，幾可亂真，實在令人防不勝防，希望公開事件提醒市民提高警覺，又話以後無論咩都好，應該致電查詢，問清楚先好畀錢，市民大眾都係要小心為上。