聽見食指動劉國勳歎鐵板鹹肉糉

適逢端午節，按照傳統大家都會食糉。而議員劉國勳早前就提早食糉慶祝，仲搞吓新意思，食鐵板鹹肉糉喎。至於口感如何？佢就話外脆內軟，口感唔錯，下次應節嘅時候會再食咁話。

盧偉國撰龍舟唱詞應節

劉國勳話本身同朋友去尖沙咀食鐵板燒，咁啱當日有街坊送咗啲鹹肉糉，就作出新嘗試喇。佢仲笑言其實都幾好食，表面煎到有啲焦脆，裏面啲肥豬肉亦相當香口。至於點解會有街坊送糉畀佢呢？佢話年年端午節前都有派糉畀市民，有啲市民見得多都互相認識，仲問佢鍾意乜嘢口味，話親手包畀佢添。所以當日派完糉，自己手頭都有唔少回禮呀。

另外，議員盧偉國就喺端午節身穿唐裝拍片，期間撰寫龍舟唱詞應節，唱詞主要圍繞希望香港早日恢復通關，再現光芒。佢又話今年端午節喺疫情下度過，氣氛同之前差得有啲遠，但依然希望市民都身體健康、如意吉祥。