食銀紙落肚 鄧銘心大呼好味道

今次表演「特技」嘅係油尖旺前區議員鄧銘心。早前佢喺社交平台上載一張食緊銀紙嘅自拍照，仲要係港幣面額最大嘅「金牛」，即係1,000蚊。究竟銀紙係點嘅味呢？佢就留言話好好味嘞。

有網民留言問佢，到底張銀紙喺邊度買？仲叫佢快啲開古。即使答案呼之欲出，但佢都故作神秘咁話「喺銀包攞出來吖嘛！」另有網民好認真咁講「蓄意毀損法定貨幣係犯法㗎」，而佢回應話「食咗就搵唔到證據！」

梗係唔怕犯法啦！事關班網民一眼就睇得出，佢嗰張銀紙只係朱古力，仲有人話之前食過100蚊同500蚊，依家終於出到1,000蚊啦，仿真度又高咗！有網民仲同佢講「下次攞件Pizza同你換啦！Pizza較鈔票美味啊！」喺呢個疫世代，真係要搵啲嘢嚟笑吓先好，起碼冇咁多負能量。