政情：謝偉銓曼聯躉愛妻同具紅魔精神

曼聯作為英格蘭超級聯賽嘅其中一支勁旅，儘管喺剛過去嘅賽季成績麻麻，好多球迷大表失望，但依然擁有一批忠實粉絲，譬如建築、測量、都市規劃及園境界議員謝偉銓就係曼聯嘅擁躉。雖然有其心儀球隊，男人世界正常不過，但難得嘅係，謝嘅太太亦都係曼聯嘅支持者。而佢哋日前參觀M+博物館，就齊齊穿上曼聯嘅情侶裝Polo衫，仲要影埋相上載社交平台放閃添呀！

話說上周六，謝偉銓趁住偷得浮生半日閒，同太太拍拖去到市民近來嘅「打卡」勝地M+博物館，欣賞建築大師傑作之餘，又細味館內陳列多位藝術大師嘅作品。行到熱熱哋，兩公婆就飲番杯冰涼飲品歎番吓。

情侶裝T恤遊M+

跟住佢就想起未擔任議員之前，都尚且有啲時間睇吓波，但做咗業界喺議會嘅代表之後，工作變得更加繁忙，捱夜睇波都變得好奢侈。

雖然唔可以對住電視睇直播，但謝話佢同太太都依然支持曼聯，所以分別穿上灰色同紅色嘅Polo衫，以示佢哋默默咁為曼聯打氣喎。

第一手消息請下載on.cc東網 iPhone/ iPad/ Android/