政情：陸頌雄笑稱電車怕水又要「水」

陸頌雄同葉永勝喺一個網台節目傾偈，話題當然離唔開有百年歷史嘅電車。葉仲講到喺電車做咗咁耐，最深刻嘅係香港首次黑雨，當時成個港島浸晒，佢同啲師傅要四出救車，事關電最棹忌水，要諗計點將啲車救返去車廠。講到呢度，陸就話太多水，電車唔掂；但唔夠水（錢）營運，都係唔掂。

搞完爛Gag之後， 陸就問葉電車應唔應該加價，葉就話對工人嚟講當然加價好，事關電車車長同工程部嘅師傅，其薪水同私人市場相差好遠，佢哋要加人工，就必須先調升車資。葉仲話童年嘅時候，菠蘿包賣5毫子，依家賣幾蚊。陸隨即話，普通嘅菠蘿包都要5至6蚊，而靚啲就要賣10蚊，可見銀紙縮水係幾咁厲害啊！

電車成人票價建議加4毫子，由2.6去到3蚊，65歲以上嘅長者優惠票價由1.2加到1.3元，但因為2元乘車優惠令長者客下跌，亦係虧蝕原因之一。陸同葉都希望政府可以補貼，長者可免費搭電車，吸引番啲長者客，同埋諗計令電車可持續發展，而唔係執笠。