政情：議辦用品 狄志遠萬元購二手梳化 姚柏良買讀稿機

狄志遠喺今年1月購入一張價值9,900元嘅二手梳化，連埋運費使咗接近1.2萬元。另外，佢亦都用2,840元買咗一個水機，以及使咗2,199元，買微波爐同雪櫃。

至於姚柏良亦都用9,780元買咗一張梳化，同埋用2,000元買咗一部讀稿機，相信係為演講者喺演講時顯示講稿內容嘅設備，睇嚟佢對於議會工作都做足準備喎！另外，田北辰都使咗逾8萬元，不過就係6個地方辦事處嘅租金同管理費，其他額外支出就較少。

講開又講，本報早前報道，有讀者爆料批評田北辰丟棄千朵膠花去垃圾站，佢亦澄清咗話係訂購嘅公司所為，嗰間公司喺報紙登道歉啟事，話未經田事先書面同意下，擅自處理帶有田頭像嘅香皂花事件道歉，亦對田嘅形象同聲譽造成損害致歉，重申事件同田及其所屬政團無關。