政情：沙頭角巧遇義工 朱國強幫手畫米通

奇遇就講唔上嘞，巧遇就好貼切。事關佢當日係去探訪沙頭角中心小學，咁啱喺沙頭角碼頭附近巧遇一班村民義工，當時佢哋喺碼頭牆上繪畫壁畫，喺度苦惱緊唔知點先可以畫到「米通」嘅質感，跟住佢就自薦幫忙，為壁畫「點晴」，示範咗畫「米通」嘅方法。

朱校長喺社交平台貼文講呢件事，跟住仲話「米通」係沙頭角世代相傳嘅特產，「打米通」更加係區內一年一度嘅盛事。話喺過年期間，班婦女都會集結起嚟喺巨型大鑊前「打米通」，加入花生、芝麻同糖漿快炒後，倒喺藤筲箕上，推至均勻同壓實，再切成小塊，非常香脆。

由壁畫講到特色美食，再延伸到承載傳統文化。佢話一直以嚟，香港都有唔少具特色嘅本土文化同習俗，認為政府應善用呢啲不可多得嘅文化遺產，發展具情感元素嘅「民俗歷奇深度遊」，畀學生同市民深入認識本土文化，學習香港人本身嘅友愛、互助、誠懇、人情味等文化優點。