昔日東方政情：怕畀老婆窒 狄志遠蝙蝠車放辦公室
難得有新車到手，當然係好高興啦。議員狄志遠（Dick）早前就做咗「車主」，仲要一口氣迎來4部新座駕！之不過阿Dick就選擇低調，新車仲唔敢向老婆亮相添！點解？因為佢今次購入嘅係玩具蝙蝠俠戰車囉，仲要係屋企一早就擺滿蝙蝠俠相關產品嘅情況下，再買多幾部，咁就難怪佢擔心老婆會詐型啦。
阿Dick最新到手嘅4部蝙蝠車，除當中一部係阿仔送畀佢，其餘都係自掏腰包上網訂購，價錢由5百至千幾蚊都有。儘管蝙蝠俠相關物品已經「成屋都係」，塞滿住所內嘅「窿窿罅罅」，但因為有新產品推出，睇落又覺得幾靚，即使有機會畀老婆「詐型」，阿Dick都忍唔住要買。由於唔夠膽將心頭好帶返屋企，惟有喺自己辦公室擺住先。
收藏多到要擺迷你倉
至於阿Dick對蝙蝠俠情有獨鍾，係始於佢童年時去剪頭髮，喺理髮店內睇睇埋埋相關嘅漫畫書，咁就迷上咗嘞。而佢咁多年嚟，儲儲埋埋嘅蝙蝠俠珍藏都有成百箱。然而數量實在太多，需要租個迷你倉去存放添！阿Dick笑言呢啲蝙蝠俠珍藏就係佢嘅資產，將來若有炒賣價值的話，就可以攞出嚟變現，當係退休生活費咁話！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
