昔日東方政情：大難臨頭 老鴿齊走 高達夫婦退黨
人稱「高達」嘅民主黨（白鴿黨）元老李永達，同太太陳樹英去年前後腳離港赴英，就已被指加劇咗黨內分化。民主黨尋日公布，該黨中央委員會收到李永達同陳樹英嘅退黨通知，並已正式通過及生效，結束兩人同白鴿黨藕斷絲連嘅狀態。而離港後行事非常低調嘅高達，尋日首次透過網絡接受前黨友嘅訪問，當中提到離港嘅其中一個原因係「自己所知太多」，又話若非事情有重大變化，否則佢相信未來一段長時間都唔會返香港。
作為白鴿黨嘅創黨成員，十多年前高達已分別做過白鴿黨嘅副主席同主席，不過去年6月佢又再度擔任副主席，理由係要「穩住軍心」喎。之但係，高達做副帥只係個多月就出走，穩軍心嘅講法自然唔成立，對一眾黨友而言亦都有欠交代。
話知得太多 留英唔想返港
而高達就喺訪談中，憶述去年年初已側聞當局有意取締某啲組織嘅消息，但佢就覺得自己風險唔高，即使去年8月初同黨友飯敍，仍自我感覺良好，但好快佢就發覺事情已經發展到某個階段，自我評估若再留喺香港，可能對自己、或其他身邊人都不利，於是佢同太太商量，僅僅幾小時就作出離港嘅決定。高達又話出走，係唔想連累其他人，畢竟自己知嘅嘢實在太多。
高達又指自己同太太先後抵達英國，兩人好快就覺得難以履行黨務及職責，而自己身為副主席，但唔能夠親身開會，難免有鞭長莫及之憾；況且佢同太太皆年逾花甲，應該要有自己嘅生活，相信自行退黨後，白鴿黨應該會無咁大壓力，對大家都會方便一啲嘅。
涉2014年佔中案，被判煽惑他人作出公眾妨擾罪成嘅高達，去年4月被判入獄8個月但緩刑兩年，結果免除牢獄之災但就「唔聲唔聲」咁出走，更被自己黨友暗寸「叫人衝、自己鬆」，被問到算唔算係背棄白鴿黨呢？佢竟然就話「日久見人心」，確實又係，當初一走了之，如今更退出白鴿黨，佢嘅心係點大家都一清二楚啦。
佢最後又提到，喺英國落腳逾10個月，期間絕少公開露面、婉拒傳媒訪問，但由下個月開始就會出席一啲公開活動，仲豪言「預咗」咁做即使有可能觸犯《港區國安法》。至於會唔會返香港呢？佢就話長時間內都唔會返嚟，除非局勢有重大變化，但恐怕變化可能係幾十年、甚至上百年先至出現喎。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
