政情：千支膠花被送堆填區 田北辰認衰

讀者楊小姐話前晚大約9時許經過馬草壟垃圾站，發現滿地都係包上膠袋嘅紅色康乃馨，而膠袋內更貼有田北辰卡通頭像同名字嘅紙張，更寫明「母親節快樂」。楊小姐話呢啲包裝咗嘅康乃馨係膠花，送到堆填區亦難以分解，隨便丟棄唔單止污染環境，更加造成浪費，所以一見到就好嬲。

佢仲話膠花唔會過期，可以留番下年再派，亦可轉贈鄰近嘅老人院，令啲老人家開心吓，唔明白田北辰為何必棄不可。佢仲話普通市民咁做已經唔啱，資深議員都咁做就絕對講唔過去。

田北辰回覆查詢時話佢喺5月7日同8日舉辦母親節派花活動，但供應商喺5月6日通知佢，其中一批花因同櫃其他貨物問題，一併被海關扣起，趕唔切喺母親節到港，所以雙方同意取消訂單。但佢勢估唔到喺冇買家嘅情況下，供應商依舊將啲花喺過去一兩天，即係前兩日運到港，仲丟去垃圾站，經垃圾車運往堆填區丟棄，佢形容呢種做法匪夷所思。佢又話因為貨品上有佢個名，所以就此致歉，日後亦會更審慎選用供應商喎。