政情：江玉歡：架構調整改陋習 拆局未必拆得掂

江玉歡指世上唔少地方都實行精簡架構，反觀本港現行嘅三司十三局，下屆政府可能會改為三司三副司十五局，而部分局嘅職能亦有改變。儘管改組方案有其亮點，例如增設文化、體育及旅遊局，以專責文、體及旅嘅發展，以免一盤散沙嘅局面，然而是次改組來得倉卒，不但社會上嘅討論唔多，就連佢都唔覺得政府對新架構具有充分嘅掌握。佢認為並非改組同加人手就可以解決問題。

佢又明言，其實政府要改嘅唔係架構，而係心態。佢話置身議會五個月來，感受最深嘅係問非所答，議事堂內大小會議，用上唔少時間作問答環節，但問完答完又點呢？有幾多官員會虛心聆聽及接受議員意見？佢話好多時候，政府對問題後知後覺，缺乏政策方向。就算有政策，亦往往不能因應時間同環境，靈活變通。雖然政府部門不斷提交報告，但都係寫多過做。與其為寫而寫，倒不如放多啲精力改善問題癥結。