政情：「臨時失業支援」被拒者眾 議員促設上訴機制

陳克勤尋日喺社交專頁貼文，指整合多個求助個案後，歸納出4個主要問題，分別係審批標準模糊，譬如兩名申請人於同一公司返工，即使兩人失業情況相若，但最終僅得一人獲批；計劃嘅承辦商亦有問題，不但熱線難以接通，就算接通亦往往要求唔好上訴；至於查詢計劃進度嘅資訊貧乏，申請人難以掌握審批進度；而就算容許申請人補交相關文件，但只得5天時限，仲唔係以「工作天」嚟計算。

咁多人「食檸檬」，當然要設立上訴機制啦。陳克勤希望由創新辦職員直接處理上訴個案，增派人手處理及審批申請，以及訂立唔超過30天嘅服務承諾，仲要改善熱線電話「打極唔通」嘅問題；同埋優化網上系統及機制，清晰標示申請進度、所需補交嘅文件等，而補交資料嘅時限，要放寬至10個工作天咁話。