政情：公僕加薪超離地 議員倡倣私企

顏汶羽尋日喺社交平台貼文，指公務員薪酬調查結果一公布，就引起社會各行各業嘩然，市民紛紛批評指標「脫離現實」。佢話市面上百業蕭條，失業率創10個月以來新高、勞動人口創10年新低嘅情況下，打工仔女對呢個結果都感到詫異。佢話社會上有唔少意見認為調查結果滯後、未能貼近社會現實，實在有需要就此作更深層思考。

唔單止咁，佢話最直接影響公務員行政效率嘅唔係加薪，而係「鐵飯碗」嘅心態！好似做又卅六，唔做又卅六。佢建議設立類似私人企業管理嘅「關鍵績效指標」，特別為高級公務員制訂更多績效指標，仲建議薪酬同埋所屬決策局或政府部門嘅績效掛鈎添。