政情：億億聲兩項目爭議多財會齋拗又通過

上屆立法會修改規則，只要經工務小組委員會通過嘅項目，上到去財委會就可以直接表決。之但係，呢個咁有效率嘅做法，好快就遇到挑戰，事關有兩個經工務小組通過嘅項目，尋日喺財委會就有議員要求重新討論。其中造價58億元、喺加路連山道興建嘅區域法院，席上幾位議員都有好大意見，質疑有否實際需要、擔心加劇周邊交通負荷；而涉款11.45億元、粉嶺第48區公營房屋工程項目，就有議員批評規劃失當，欠缺通盤考慮。但即使爭議多多，兩項目最終都獲得財委會通過。

財委會首先討論嘅係加路連山道興建新嘅區域法院，不過一開波，就遭到議員圍攻。議員陸頌雄引用局方提供嘅文件，指由於涉及社會事件案件急增，為司法機構帶來挑戰。但佢認為涉及社會事件嘅刑事案高峰期已過，事關「好多人都身有屎走咗佬」，質疑有咩理據，指相關案件有增長嘅需求。陸又重申，應以「黑暴」形容社會事件，強調司法部門要有自己嘅立場。

出席會議嘅司法機構政務長梁悅賢，就指區域法院嘅案件總量有15%上升，需要更多法官辦公室以縮短排期。

新區域法院被質疑選址不合

議員林新強就話近來收到有關法庭擴音系統嘅投訴，指好多人都覺得音量微弱，聽唔清楚法官嘅說話，認為問題「一日都嫌多」。梁悅賢就解釋話，防疫措施會影響收音，各級法院已進行音量改善工程。

議員鄧家彪就表示，新法院大樓用地應該莊嚴同獨立，但現時嘅選址竟毗鄰商業用地，布局上似乎唔適宜。梁悅賢則指新法院大樓係獨立建築，與鄰近商業發展有足夠距離。

至於議員梁熙就批評新區域法院所坐落嘅位置，附近交通經常由「街頭塞到街尾」，加上又係「學神」嘅考牌路線，擔心項目會加劇交通壓力。運輸署助理署長（市區）何廣鏗用簡報說明情況，指已考慮人流增加及過路處闊度足夠行人使用。

粉嶺公屋發展被指規劃失當

財會另一項討論，係涉款11.45億元嘅粉嶺發展嘅工地平整同基礎設施工程。議員劉國勳批評政府規劃失當，強調北區應整全規劃，又斥政府5年內並無接觸村民討論安置安排，實在浪費時間，促政府承諾無縫交接原區安置。議員陳克勤亦指政府公屋規劃失誤，形容項目「好聽叫粉嶺48區，難聽叫和合石」。

政府回應話，如按照居民訴求就會延遲收地，影響公屋發展時間。又話即使未能做到無縫交接，不過房協及房委會轄下有租置安排。不過劉國勳就質疑，話要居民一年搬兩次屋並非合理安排。