昔日東方政情：建新區院 司法機構倡改善4路段
政府計劃喺加路連山道興建新區域法院大樓，以取代將會清拆嘅灣仔區域法院，但項目就惹來多名議員憂慮，認為會造成大塞車，又指政府提交嘅文件未能釋疑，要求立法會財務委員會進一步討論。就喺財委會審議呢個項目嘅前夕，司法機構尋日再解畫，指政府會按交通影響評估嘅建議，進行4項道路改善工程，包括建連接路同增加車道等。
作詳細交通評估
司法機構去信財委會，應議員要求提交政府有關新區院大樓交通評估嘅補充資料。政府文件指早喺2018年至2020年進行加路連山道改劃用地申請時，已作出詳細嘅交通評估、對附近環境嘅影響亦有考慮，包括所產生嘅車流同每年車流預測增長，就連法院落成後第5年，即2031年嘅交通影響都有評估埋。
就交通影響評估嘅建議，政府縮減用地以騰出土地進行道路改善工程，而毗鄰嘅商業用地發展商須按照土地條款，喺加路連山道同禮頓山道交界，以及喺加路連山道同連道交界路口等一系列嘅改善工程，4項工程包括新建一條連接路貫通加路連山道東西兩端、修改一個類似迴旋處嘅通道同增設車道等。
造價58億元嘅新區域法院大樓，早前喺工務小組委員會討論有關項目嘅時候，都有唔少議員批評泊車位少同影響附近嘅交通，但係最終都獲得通過。但有多名議員擬推翻工務小組嘅建議，去信財委會主席要求作進一步討論。唔知呢份政府嘅補充資料，說唔說服到班議員呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
