昔日東方政情：炮製楊枝甘露盧偉國獲封「立會廚神」
喺議事廳，若果遇到啲準備不足、答問題又帶你遊花園嘅官員，班議員就真係火都嚟埋，好勞氣。喺呢個時候，食番碗糖水，潤吓喉補吓肺嘅話，咁就冇得頂喇！尋日議員就有口福嘞，事關議會「大廚」、工程界議員盧偉國（WK）請議員同事品嘗由佢親手炮製嘅楊枝甘露，林琳仲連食4碗添！
鮮甜口感滑 林琳連食4碗
林琳喺社交平台貼文同上載相片，就係佢同另一名議員郭偉强食緊糖水，WK就企喺側邊。連食4碗嘅林琳大讚WK整嘅楊枝甘露好味到無得彈，仲封咗WK做「立法會廚神」。佢仲話當中嘅杧果好食到不得了，梗係喇！WK話特登揀咗呂宋杧，貪佢夠鮮甜，無其他雜味，拼埋個泰國蜜柚同日本富良野3.6牛奶，口感滑到無人有。
食過廚神整嘅糖水之後，林琳引述其他議員話，若果下次食唔番咁好味咁點算呀？跟住又叫WK考慮下個月再整多次，事關林筱魯尋日忘記帶電話，無法通知佢過嚟分甘同味喎。話時話，WK係煮得之人，不時喺網上示範巧手廚藝之餘，仲教埋大家點煮添！既然林琳咁貪食，不如都上網學吓嘢喇！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
