昔日東方政情：政府交文件例遲議員斥消化唔切
立法會尋日舉行大會，有議員提出「加強與完善選舉制度後的議會合作」嘅口頭質詢，期間就有議員趁機表達對政府表現嘅不滿，其中議員梁熙批評政府過往多次「遲交文件」，更試過會議前一晚先至向議員提交文件，議員根本冇足夠時間消化內容及準備。
曾國衞：想做得仔細
梁熙舉例上星期嘅衞生事務委員會，當局喺會議前一晚8點半先至提交文件；早前財委會特別會議都有同樣情況，都係開會前不久先至正式提交文件，令議員唔夠時間消化同準備問題，建議政府不如連文件提交時間都設「KPI」（關鍵績效指標），冀政府日後更加認真工作、重視議會。
政制及內地事務局局長曾國衞就話了解相關情況，但佢解釋政府處理文件希望盡量做到仔細，收集意見或有延遲，會向政府內部反映，呼籲盡快交文件作改善。
至於議員鄧飛就話，希望政府唔好喺制訂政策嘅後期先至詢問議員意見，認為草擬過程中就應該先徵詢。曾國衞同意鄧嘅講法，指行政立法良好互動係良政善治嘅基石，日後會強化吸納議員意見嘅渠道。
另外，現屆政府任期只剩個半月，曾國衞表示，喺今屆政府完結前，將向立法會提交另外約10項關乎改善民生促進經濟發展嘅條例草案，包括《院舍法例（雜項修訂）條例草案》及《版權（修訂）條例草案》等。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
