政情：中大發聲明 撐段崇智獲續聘 劉國勳轟掩耳盜鈴

校董會嘅聲明指，段嘅續任安排係遵照中大沿用多年嘅程序，行之有效，亦同多間本地及國際大學採用之續聘程序一致。歷任中大校長皆經過競爭激烈嘅全球公開招聘程序，最後由校董會聘用。鑑於現任校長最初係通過廣泛招聘程序獲得聘任，如果校方同現任校長雙方均同意續任，校方則毋須再次展開廣泛招聘程序，呢個做法亦廣為接受。

聲明中亦話段嘅第一屆任期將喺2023年底屆滿，有個別校外人士質疑校方點解喺任期屆滿前18個月，就作出續任決定，有關言論並唔合理。若校方同現任校長未就續任達成共識，校方需盡早展開全球招聘程序，另覓校長人選。根據中大同本港其他大學過往經驗，新校長招聘預計需時至少12至18個月。聲明又強調今年3月已就續任廣泛諮詢校友教職員、學生、大學管理層及校董會，並獲各方對安排嘅積極回應。

雖則係咁，但唔一定令人信服。好似早前亦有就段續任一事表態嘅劉國勳，當時亦批評段喺黑暴期間，立場唔夠堅定，而對於校董會發表嘅聲明話段係按既定程序獲任，佢對此感到失望。佢認為現時社會對於續任安排出現很多爭議，加上大學是使用公帑，有校友亦不同意安排，認為中大此舉令人感覺掩耳盜鈴。佢認為喺續任安排上有改善同檢討嘅空間，中大應持開放態度改善，而唔係只係堅持自己立場，又形容自己對中大「愛之深責之切」。

佢又話中大校董會過去幾次發聲明，但佢事前並未獲告知，佢都係喺媒體報道先得知。佢亦話校董會份聲明有意將整個校董會成員綑綁，做法唔理想。

唔單止劉國勳對段續任嘅安排有意見，另一議員何君堯早前亦批評有學生以「暴大」為榮，直指校方管理層肯定有人失職，但校董會通過續聘段，仲話段喺校內諮詢獲得「廣泛支持」，對校方決定深表驚訝。另一議員陳月明亦話校方應就續聘同諮詢過程應向公眾解釋，所以去信教育事務委員會主席，邀請中大派代表出席，以釋除社會各界疑慮。

究竟中大校董會嘅聲明係咪可以撲到火，平息風波抑或變相火上加油？睇怕要睇後續嘅發展嘞！