政情：親睹劏房戶困境 震撼黎棟國

黎棟國首先去咗幢唐樓，嗰個單位本來都已經係細，但被劏成7間劏房，每間劏房只有不足50呎，放到一張塞滿雜物嘅碌架床之外，根本就放唔到其他嘢，走廊亦好狹窄，因門上嘅橫樑，佢幾乎要彎低腰先入到去，當見到行動不便嘅婆婆坐喺床上，諗到對方連出入都有困難，就感到難過。

跟住佢又去探咗一個單親家庭，嗰位女士同囝囝住喺不足80呎嘅劏房。媽媽本來有工作，但因疫情關係，社區嘅暫託服務停頓，由於要照顧囝囝，無法上班，生計大受影響，連交租都成問題。

長者及單親家庭嘅困境，都係深層次問題未解決所致，黎棟國話會繼續催促政府加快興建公營房屋，仲要其他部門給予基層市民更多嘅支援。