政情：羅致光孤寒 電車恐陰乾

電車申請加價嘅理由係依家物價指數持續增長，客源未回復疫前水平，錄得300萬元虧蝕。其實，電車一直有向長者提供優惠票價，65歲或以上嘅長者，依家嘅票價係1.2元，若果加價後就係1.3元，即係加咗一毫子。不過，由於兩蚊乘車優惠計劃2月底擴展至電車，60至64歲人士原本要畀2.6元車費，持樂悠咭就只係畀兩蚊。

公共交通工具加價，即係市民交通開支增加，具勞工背景嘅議員郭偉强就喺社交平台發貼文，問市民點睇電車加價，仲話之前兩蚊乘車優惠計劃唔包括電車，已經令到電車幾乎流失所有長者客，亦失去咗原有嘅價格優勢，又批評政府認為電車長者車費低過兩蚊，所以唔使津貼，某程度上係對電車嘅慢性毒藥，搶走客源，係咪意味有意逐步淘汰電車？

以前政府曾經講過，長者佔電車整體客量六分之一。郭偉强就話六分一嘅客量唔算係小數目，雖然65歲以上嘅長者畀嘅車費低過兩蚊，但因為乘車優惠計劃，喺有比較下，唔少長者已經選擇搭其他交通工具，咁樣只會令電車客量繼續流失。其所屬嘅工會同前議員早已建議為長者提供免費乘電車，以65歲以上長者嚟計算，每年只需100萬元，若果加埋樂悠咭嘅話，條數可能會多啲，但應該都係所費無幾，而咁做就可以幫到保育電車，但係政府偏偏就係唔做。

郭又話工會不斷向當局提出相關嘅要求，但係局長羅致光堅持低過兩蚊就唔會有津貼，批評羅嘅諗法死板，既然係要幫班長者，就應該行多一步。佢仲話由於電車提出加價申請，工會必然要再跟進為長者提供免費乘搭電車，佢透露稍後會喺立法會相關嘅事務委員會再提出相關要求，唔會畀政府側側膊當冇咗件事。