政情：着「牛油果」貪清新 張國鈞吸同事埋身

話說議員陳恒鑌尋日喺社交平台上載一張合照，當中可見幾位西裝骨骨嘅男議員，仿似眾星拱月咁圍住身穿粉綠色乾濕褸嘅張國鈞，而陳就形容張走型格路線；至於有份合照嘅議員李世榮，則形容張好似一粒牛油果。議員何俊賢雖則咁啱不在場，冇份合照，但留言笑稱「儘管在沒有我的世界爭第一吧」。

議員陳克勤就額外上載佢同張嘅合照，話呢隻綠色唔係人人都可以襯得起，覺得張好有韓星風範，仲話着咩色衫，某程度上係反映當時人嘅心態，而清新嘅顏色，可能都代表張心情好啊！

張國鈞就話踏入春夏之交，開始轉季，因此衣着上揀選一啲清新嘅顏色。佢話呢件外套早前買落但未着過，尋日係第一次「出場」，無諗過會令到議會同事注目。佢話「都好震驚班同事會咁震驚」啊！佢估計平時男議員嘅衣着以黑、藍、灰等深沉顏色居多，萬料不到佢嘅衣着顏色咁清新，先會咁大反應囉！