政情：討論範圍多 3委會先開鑼議員憂食白果

即使周身刀，但未必張張都鋒利。立法會內務委員會旗下9個研究政策事宜小組委員會，當中3個尋日召開首次會議並選出正、副主席。不過會議一開波，唔少議員對小組委員會所涉及嘅範疇同職權提出意見，有人擔心職權範圍定得太闊，到最後乜嘢都做唔到喎。

最先開會嘅係促進粵港澳大灣區發展事宜小組委員會，議員容海恩同黃國，分別擔任正、副主席。面對覆蓋範圍甚廣嘅大灣區，與會嘅議員提出意見雖林林總總，但有幾位議員就擔心議題太多，一年內「乜嘢都掂吓」，最後未能發揮效用。議員黃英豪更舉例話，就算政府轄下嘅粵港澳大灣區督導委員會由行政長官主導，每年開銷千幾二千萬，至今亦唔知有乜嘢成效。

恐議題太闊政府未必執行

緊接其後嘅研究制訂長遠青年政策和發展藍圖小組委員會，分別由議員廖長江同議員梁毓偉當選正、副主席。廖長江話青年事務屬於跨部門政策，應該約見政務司司長，但依家該職位懸空，會考慮約見特首辦主任或者其他政策局，及後再同議員匯報。

隨後嘅改革扶貧政策和策略小組委員會，議員葉劉淑儀同議員鄧家彪分別當選正、副主席。但由於葉劉不在席，改由鄧頂上主持會議，而鄧主持議嘅作風，異於前兩個會議，直接限定每人發言兩分鐘。大多數與會嘅議員希望改革扶貧政策，以及實行精準扶貧，但同樣嘅問題又出現。議員李世榮擔心議題範圍太闊，難以討論之餘，政府亦未必執行喇。

另外，立法會鐵路事宜小組委員會主席陳恒鑌，尋日喺會議中指出該委員會計劃討論鐵路發展策略2014、施政報告中提及嘅規劃、信號保養等，亦會考慮議員意見。鑑於委員會今年較遲展開工作，及後有加會嘅安排。

會議上，多位議員提出對未來工作嘅建議，包括希望討論鐵路基建增加質量及效率、應用創新科技、研究跨境鐵路等。議員陳克勤更指出要研究南北鐵路系統，同時認為投放資源喺商場、物業管理、地產等對鐵路並無效益，新鐵路應開放畀其他鐵路公司營運，唔好只靠港鐵。