昔日東方政情：考大巴牌肥佬 鄭景陽反思出路
舊年因宣誓問題而被政府DQ或自行辭職嘅區議員，好多都要面對出路嘅問題。辭職逾10個月嘅觀塘前區議員鄭景陽，日前就走去考大巴牌，似乎有意投身運輸業，然而路試表現太緊張，落得「肥佬」嘅下場。雖然有網友鼓勵佢再接再厲，但佢就耍手擰頭，話發現自己學完都應該唔會揸巴士搵食，同埋要反思自己到底擅長於邊一方面喎，莫非一次路試失利，就令到佢開始懷疑人生？
話發現學完都唔會揸
鄭景陽日前喺社交專頁貼文，話自己考大巴「肥佬」，又自我安慰咁話，雖則路試過唔到關，但佢個人覺得都係一個體驗。有網民問佢，考大巴牌難唔難？佢話難度比私家車高，轉彎時要左睇右睇，又指自己衰在太緊張，否則係有合格嘅機會。觀塘區議會前主席蔡澤鴻亦有留言，建議佢不如去揸小巴，但鄭只係回應一句「責任重大呀」。
儘管有網民認為佢吸取今次經驗之後，下次再考應該冇乜問題，不過佢就話發現自己學完都應該唔會揸，再報又要花錢，係咪可以試其他嘢。其實鄭景陽喺今年年初，曾拍片指自己多次見工但屢屢失敗；依家又話打消揸車搵食嘅念頭，到底佢係想嘗試乜嘢呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
