政情：工程價低者得多問題議員促改革招標制

政府招標制度被指過分注重「價低者得」，漠視質素，導致唔少工程延期，甚至引發安全問題。立法會尋日續會討論「改革招標制度，扶助本地企業」嘅無約束力議員議案，並喺無記名表決下獲得通過。提出議案嘅建築、測量、都市規劃及園境界議員謝偉銓話，現行嘅採購及招標制度，過於着重招標價錢，容易造成「割喉式入標」，造成建造業界惡性競爭同埋影響服務質素。另有多名議員發言期間，都批評政府過往未有足夠政策支持本地企業。

謝偉銓話割喉式入標嘅不合理水平影響產品服務質素，導致工程「爛尾」同追加開支，有項目開工入標價愈壓愈低，工程質素下降令進度延誤，甚至造成安全問題。佢又話顧問公司合約質量同收入不成正比，導致行內人才流失，政府相關部門增加人手監管令公務員編制膨脹，變相政府同私人公司「搶人」造成惡性循環。工程界議員盧偉國就建議，政府向立法會財務委員會提交工程撥款時要同步進行招標，以便工程盡快展開；顧問合約要避免割喉式入標，如大幅低價應扣分，避免濫用補償申索制度。

梁美芬斥無採購政策支援港企

議員陳克勤拎起立法會派發給議員使用嘅環保鉛筆，提到鉛筆係內地製造。佢引述立法會秘書處指，內地生產嘅環保鉛筆約30蚊100支，即平均3毫子一支。但香港製造嘅類似產品，每支就要賣5毫子至1蚊。佢話，其實本港亦有環保鉛筆生產商，政府部門採購就因為價低者得，而選擇其他地區嘅產品，而唔係支持本土企業。要求政府應在合理價格前提下，帶頭採用本地環保物質。

議員梁美芬則提到，自己曾任環保促進會主席及香港世界貿易組織（WTO）中心創辦人，WTO各地成員政府都有採購政策去鼓勵創科行業，唔明點解香港冇採購政策去支援。佢認為，本港唔可以完全依賴外地產品，應增加採購香港本地研發嘅技術咁話。

不過，議員邵家輝則對完全否定價低者得嘅安排有所保留，認為價低者得嘅做法行之已久，大原則上冇太大問題，只係大型政府工程上，要考慮公司質素同埋創新元素，唔應該完全取消價低者得。

財庫局話七成係靠技術分中標

財經事務及庫務局局長許正宇回應指，政府鼓勵大型合約分拆，讓中小企參與，2019年已推出支持創新政策，70%都係技術評分最高者中標；環保產品服務方面，已經要求合乎經濟效益情況下，購買環保產品同服務。發展局副局長廖振新就強調，當局唔係只以價低者得為準則，會評估創新、可持續發展等因素。廖又話為避免低價搶標有剔除價格過低者，過往3年工務工程同建築合約分別有四成同六成由非最低價者投得，發展局會不斷優化及持續檢討相關制度。