政情：有理想怕揸兜文化發展落後投資藍圖解憂

儘管香港具有中西合璧嘅文化土壤，但有關文化藝術嘅發展就稱不上蓬勃，較諸鄰近地區尤其遜色，亦導致年輕人難以發揮其文藝才華。有議員尋日喺立法會會議上提出「制訂未來5年文化藝術政策及發展藍圖」議員議案，要求政府於架構重組後，盡快制訂具遠見嘅相關政策；短期而言，就要增加對業界疫後復常支援。而議案就獲兩部分出席會議嘅議員，喺各自過半同意下通過，而6項修正案亦同時通過。

喺尋日嘅會議上，好幾位議員都希望下屆政府應趁着重組架構嘅機會，成立「文化體育及旅遊局」。其中議員梁熙，就指自己過去都懷着音樂同埋電影夢，並曾一度視為終身職業。但最終，佢都同其他志同道合嘅朋友一樣，礙於本地社會嘅現實，結果冇一個人入行，畢竟大家都擔心會「揸兜」啊！佢希望政府能制訂清晰目標及藍圖，唔想見到年輕人因擔心搵唔到食而放棄理想。

增加支援助疫後復常

至於提出今次議案嘅議員鄭泳舜，就敦促政府盡快制訂藍圖，以協助香港發展為中外文化藝術交流中心，同進一步提升市民對中華文化嘅認識；又建議透過產業形式嚟推動，以增加觀眾同就業職位。但另一方面，可供表演嘅場館因疫情而關閉，業界經營艱難、人才流失，政府應短時間內增加支援，譬如內含一至兩場文化表演嘅「文化電子消費券」，可有助業界喺疫後復常。提到政府「泵水」，鄭就指出2021至22年度，政府雖投放57億元發展藝術文化，但大部分係用於公共演藝場地或博覽館等硬件設施，而用於資助藝術團體就只有4億元，比例極少，促當局檢討現時有關文藝項目嘅撥款分配同機制。

議員馬逢國亦都同意，本港要提升自身文化實力，不應只側重於硬件建設，形容「打鐵必須自身硬」，指不能輕視基礎文化教育以及人才培訓，應設立專門嘅藝術學院，增加藝術人才同年輕觀眾群。

旅遊界議員姚柏良就指出，文、旅融合係全球趨勢，香港有唔少文化歷史故事可以吸引遊客，但前提需規劃有關路線，以及完善上落客停車位、行人路、洗手間等旅遊配套，且需考慮社區承受能力等。

加強與內地政府溝通

姚柏良又要求政府做好內部協調，更要與內地政府加強溝通，制訂長遠嘅路線圖。

出席會議嘅政府代表，署理民政事務局局長陳積志就話，文化係展現軟實力嘅載體，香港必須確立文化立足點，以促進中華文化喺國際嘅影響力。陳又指政府一直透過創意智優計劃，以及電影發展基金等，培育人才同促進初創企業發展，冀打造香港為亞洲創意之都。