政情：新舊相對比 吳政亨決意減肥

吳政亨喺貼文中話近日喺囚室睇報紙，睇睇吓突然發現一個似乎有啲熟悉但又好陌生嘅人樣，再仔細睇吓原來係自己嚟，因為嗰個係20年前嘅自己，睇住兩張相隔20年嘅相拼埋一齊，好似整容前、整容後廣告咁，話有啲感嘆，事關睇到自己原來20年嚟走樣走成咁，又好似有啲對唔住自己。

尤其係近年嘅肥胖亦開始影響健康，早幾年已經有脂肪肝問題，同埋亦經常頭暈同容易疲倦，所以佢決定立下「中年無脂」嘅宣言，要減肥。聽聞家人喺上月探佢嘅時候，佢上磅有85kg。為咗搣脂，佢話已開始節食，每日早晚都做運動，包括跑步、深蹲、掌上壓同拉背等等，暫時目標係3個月內減10kg。佢仲話還押中冇辦法影相，要check住佢嘅進度惟有靠探訪嘅親友做人證，仲話家人會誠實咁講實況，若果佢懶嘅話，佢會逼家人鞭策佢喎。

佢因前年參與或組織民主派35+初選，涉嫌違反《港區國安法》被控串謀顛覆國家政權罪，由去年年初被捕並還押至今。