政情：何啟明慶母親節 送老婆驚喜禮物

話說何啟明尋日出席一個慈善活動時，問到佢啱啱過咗嘅星期日點樣慶祝母親節，佢話一早去搵定位同媽媽飲早茶。冇下文喇？跟住佢就話仲送咗紮玫瑰花，因為自己仲有嘢做，所以冇乜時間陪佢食晚飯。佢再補充話周不時都會同佢食飯嘅，如果孝順嘅話，日日都係母親節啦！

咁又點同老婆慶祝呢？佢話老婆啱啱喺巴黎讀書放假返港，依家要喺酒店隔離7日，今日先完成隔離出關，所以要今日先可以帶埋囝囝同佢補番。

咁你同囝囝揀咗乜嘢送畀佢呢？佢話囝囝就努力讀書，將自己嘅成績喺學校換咗個髮夾送畀媽媽，至於自己嗰份就話唔講住喇！要保持神秘喎，仲話要送一份驚喜禮物畀另一半，咁有乜秘訣呀？就係靠平時同佢相處時，留意佢嘅需要同喜愛先得。