昔日東方政情：豬肉檔AK爆紅 葛兆源街市追星
追星文化吹入政界！話說最近發現「荃灣豬肉檔AK」後，好多粉絲去咗荃灣楊屋道街市「朝聖」，勢估唔到尋日竟然見到佢！
佢係邊個？咪係荃灣區議員葛兆源囉！佢喺社交平台貼文，話趁假日陪屋企人去荃灣街市買餸，同朋友「阿威」合照係好合理嘅，而呢個阿威就係近日爆紅嘅 「荃灣豬肉檔AK」，葛兆源仲上載咗佢哋嘅合照。
唔認自己係「豬肉粉」
呢個貼文同張相出街之後，惹嚟大批網友熱議。有網友叫佢唔好同啲粉絲爭，亦有網友質疑「咩料呀，你又去合照？」佢竟然咁回應：「咁啱經過，畀佢捉住，你信唔信？」有啲網友又讚佢靚仔過阿威，仲係福來邨Stanley添！事關佢區議會嘅選區就係福來邨。但佢唔敢認，話唔想得罪啲粉絲喎。
另有網友亦質疑「議員都玩打卡」，仲問佢係咪「豬肉粉」？佢即刻話強調絕無此事，又話自己都有好多「葛」粉。可能網友太多意見，佢都招架不住，突然拋咗句「唏噓嘅豬肉佬+唏噓嘅議員係好合理」。咦！戴咗口罩都見到佢哋笑緊，仲豎起拇指，又有幾唏噓呀？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
