政情：政府工程價低者得 建築界人才流失

建築、測量、都市規劃及園境界議員謝偉銓（Tony）批評政府嘅工務工程及顧問項目招標制度，偏重「價低者得」，原意係避免浪費公帑，但隨着業界競爭加劇，加上近年立法會拉布令政府工程量不均、社會事件及疫情令私人工程量減少等，導致業界出現「割喉式入標 」嘅現象，情況日趨嚴重。

Tony話若果相關顧問公司嘅入標或中標價不合理地低，同樣會出現「將貨就價」，影響設計及監管質素；而顧問公司亦可能要「將人就價」，聘用數量不足、資歷及經驗較遜嘅人員負責有關項目，導致業界普遍出現工時長，收入與工作量不成正比嘅問題，年輕專業人士因而轉行，加劇香港嘅人才流失。

喺政府嘅層面，Tony話由於承建商同埋顧問公司工作質素下降，惟有不斷增加公務員人手，以加強監管承建商表現，導致公務員編制膨脹，政府更以高薪向私營業界「搶人」，亦令到業界更難聘請、留住足夠和有經驗嘅人員，形成惡性循環。佢形容政府錢就使咗，合約亦批咗，但市民就遲遲睇唔到好嘅結果，搞到香港競爭力不升反跌，反問若香港專業界本身亦出現人才荒，談何融入國家發展大局呢？

為咗令政府正視呢個問題，佢喺聽日召開嘅立法會大會上提出議員議案，促政府改革各個政策局以至資助機構嘅招標及採購制度，包括引入扶助本地企業嘅元素，避免綑綁式招標、更着重創意同創新、進一步降低價低者得嘅比重，並為各類招標項目制訂最低合理費用以杜絕割喉式入標，從而積極扶助本地中小企業發展。