要聞港聞

笑看天下:安民之道在察其疾苦

香港社會表面富貴,佳餚美酒、奢侈品匯聚,這是不爭嘅事實;然而,華麗奢華背後,卻住着約20萬劏房戶,佢哋「屈室求居」,有無數唱不完嘅悲歌!大家都不難想像,兩年多嘅新冠疫情,一家幾口擠在一個廚廁合一嘅空間下,若不幸有一人感染,肯定全家中招!
好喇!5月開始天氣漸漸轉熱,香港每到7、8月,酷熱天氣警告特別多,劏房戶冇冷氣根本頂唔順!而冷氣費霎時飆升一千幾百元,都幾係嘢!加上有些無良業主又不按實單收費,新生效嘅租管條例又淪為無牙老虎,劏房戶真係「任劏」!
本報尋日又為劏房戶發聲!事關上月北角發生劏房倫常命案,一個19個月大女嬰被揭伏屍睡床,經調查後發現係一宗疑涉及母親嘅倫常慘劇。上址「一開六」嘅劏房單位遂變凶宅,倫常慘案殃及鄰居捲入鬧鬼風波,各自承受難言之痛及經濟重擔。
據悉,事主親戚曾在涉事劏房做法事,然而一眾租客仍感不安,6戶中已有5戶搬走,剩下一戶因租約綑綁未能取回按金,面對沉重經濟壓力,無奈留下苦撐。之不過,租客整日疑神疑鬼,失魂喪魄,難以安寢。
發生呢啲慘事,租客「走唔甩」,因為新租管條例儘管實施逾3個月,但根本畀唔到保障佢哋,唔好講話攞番按金,唔少劏房戶仍然被濫收水電費,有業主甚至以口頭租約方式出租劏房逃避規管,可見所謂新租管條例名存實亡。
當然,業主嘅物業淪為凶宅固然不幸,而劏房戶未能盡早遷走,身心備受煎熬更令人關注。事出突然,政府更應出手相助,給予「驚恐戶」臨時安頓;當政者應念及安民之道在察其疾苦,政府是做實事抑或口噏愛民當秘笈,一個簡單例子盡見矣!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500