政情：家有廚神煮乳鴿馮浩賢放閃

多名高官同議員早前因參加「洪門宴」而惹出播疫風波，而時為政策創新與統籌辦事處副總監、現為指定檢疫酒店計劃辦事處副處長嘅馮浩賢當時亦有出席，最後更加要接受上司口頭警告。而佢喺社交平台沉寂咗一排之後，近日又開始「蒲頭」，除咗分享佢去咗西九M+博物館嘅感受，尋日貼文指太太喺母親節「大發廚威」，究竟係所謂何事呢？

去西九M+博物館放鬆一下

馮浩賢喺社交平台貼文話由於過去兩個多月，長時間集中精神處理大量抗疫嘅工作，因此係時候放鬆一下，其中參觀文藝嘢就正中佢下懷。佢話文化同旅遊息息相關，只要適度配合，好嘅文化產品，加上附帶嘅設施如餐廳、商店或設計優良嘅公共空間，就可以同旅遊發揮協同效應，佢都好期待西九日後成為一個更完整嘅文化區喎，而參觀亦成為佢無休止工作之後嘅一點慰藉。

心靈層面滿足後，佢亦一飽口福。事關佢尋日講到太太「大發廚威」，炮製咗幾款食肆水準嘅菜式，其中包括乳鴿等等，好多網民都話佢有食神，甚至讚佢太太廚藝了得添！之不過，有網民話尋日既然係母親節，點解仲要勞煩太太下廚呢？