政情：仙人掌開花 黃傑龍喜迎吉兆

黃傑龍話今次開花嘅仙人掌，係8年前喺一所學校拾獲嘅仙人掌子株，當時嘅體積微小如一粒花生米，及後栽種愈發壯大。佢話眼見仙人掌咁多年來都不斷增生子株，以為仙人掌毋須開花授粉即可自行繁殖，估唔到仙人掌竟喺日前發芽，仲喺尋日開花綻放！跟住佢上網搵相關資訊，話具堅韌生命力嘅仙人掌，一旦開花就意味着強大生命力，反映主人照顧得宜，家中風水良好，係吉祥嘅徵兆。雖則佛嘅象徵係蓮花，但仙人掌喺佛誕日開花，都未嘗唔係好兆頭。

講起好兆頭，佢又提到早前喺辦公室飼養6條俗稱「米奇魚」嘅觀賞魚，但短時間內死咗一半，於是佢就喺魚缸種咗啲植物，殊不知米奇魚嘅排泄物成為植物嘅養分，茂盛生長形成一個小生態，剩低嘅米奇魚就快速繁衍，生生不息寓意吉祥，令佢體會到小至一個魚缸，大至一個地球，生態平衡都相當重要。