政情：直播擾攘 黎煒棠痛失珍貴襟章

話說尋日登上「烏蠅頭」最後列車嘅鐵路迷，唔少都攜有九廣鐵路時代嘅收藏品。而黎煒棠嘅外衣口袋就別上俗稱「黃頭」、「烏蠅頭」同埋「1900」列車襟章。佢話自己平時好少搭火車，但尋日就破例搭一次，順便做埋直播，跟住佢就滔滔不絕咁講述九廣鐵路同港鐵合併前後嘅分別，大讚過去九鐵行車暢順，連車廂廣播都零舍唔同，當佢講到九鐵採用嘅英國製列車，頭等席嘅絲絨座椅特別柔軟舒服嘅時候，佢突然驚呼「咦，死啦，大鑊！跌咗烏蠅頭……」直播亦隨之中斷。

片刻之後，直播恢復，黎煒棠話嘗試進行地氈式搜索，但係都遍尋不獲，又指喺車廂裏面人來人往，「烏蠅頭」襟章有可能係畀其他人踩走咗。後來黎煒棠喺Facebook貼文，話尋日去過港鐵沙田站嘅朋友，睇吓鞋底會否多咗一個九鐵年代嘅列車襟章，搵到會有薄酬咁話。黎一再強調襟章係絕版貨，話搵唔番真係好傷心喎。