政情：油尖旺頻現鼠蹤 恐爆新冠

油尖旺區係鼠患重災區，當區有好多街市、熟食小販、舊樓等，令老鼠四出「搵食」。所以李偉峰就透過油尖旺區議會嘅食物環境衞生及工務委員會，了解當區鼠患問題，早前亦去信食環署，問及最近兩年捕獲老鼠嘅數量、滅鼠方式，甚至係捉到嘅老鼠有冇染疫，並希望食環署喺下周二（10日）出席會議。

署方指喺區內進行一星期最少3次嘅防治蟲鼠工作，包括採取預防措施以斷絕老鼠嘅食物來源、清除老鼠嘅藏匿點及以水泥、金屬網或其他填充物堵塞老鼠來往嘅通道。而過去兩年，署方喺油尖及旺角區共捕獲8,008隻活鼠及收集13,544隻死鼠屍體。而署方亦強調自去年2月起，署方按香港大學嘅要求，提供老鼠樣本作2019冠狀病毒檢驗，現時未有實質科學證據證明老鼠可傳播2019冠狀病毒畀人類。