政情：阿牛踎監覺艱辛瘦咗十幾公斤

失去自由嘅滋味，一日都嫌長。社民連成員曾健成（阿牛）因涉前年7‧1遊行，被控煽惑他人參與非法集結，去年10月被法庭判囚10個月。儘管實際上，阿牛只係服刑7個月就重獲自由，但佢尋日朝早出獄，就話體會到坐監係一件好痛苦嘅事，又向記者展示一張孫仔嘅相片，相信係佢繫獄期間嘅精神慰藉。而巧合嘅係，尋日係阿牛孫仔嘅兩歲生日。

尋日一大清早，阿牛嘅昔日戰友開始喺赤柱監獄外面聚集，喺9點半左右，阿牛乘坐高球車到監獄閘口，佢手持一個「包頭」及黑色斜揹袋，當見到有人接佢放監時即刻揮手，喺上周出獄嘅社民連前主席吳文遠趨前迎接，而阿牛就展示一張仍在監獄還押、已解散嘅前支聯會副主席鄒幸彤嘅畫像，指依家獄中有齊律師、醫生、學生及教授，暗批號稱「好打得」嘅特首林鄭月娥，打散咗香港。阿牛又話佢有好多老友已經移民他邦，香港亦變得陌生、今非昔比。

講起鐵窗生涯，阿牛話自己只係坐監大半年已深覺痛苦，並且瘦咗十幾公斤，連肚腩都見唔咗，佢慨嘆仍有好多人遭到重判，而部分涉違《港區國安法》嘅被告，其還押嘅日子較佢坐監嘅刑期更長。至於出獄後第一時間要做嘅事，阿牛話想打電話畀孫仔，事關尋日係孫仔嘅兩歲生日，仲提到即將到臨緊嘅母親節，因防疫所限，孝順仔未必能盡孝道。阿牛又指自己喺獄中仍關注時事，表示第5波疫情短短兩個月已有逾9,000人死亡，認為政府應作出檢討，並成立獨立調查委員會。

十幾人接出獄

尋日接阿牛出獄嘅人士約十幾人，由於防疫規定，眾人見到「阿牛」時都要分開企，大約逗留咗15分鐘後，阿牛就坐接應嘅7人車離開。

綽號「阿牛」嘅曾健成，曾經係民主黨創黨成員，其後又於2006年籌組社民連。阿牛曾於1995至1997年間出任立法局議員；2003至2011年期間擔任東區區議員，2019年再次當選，惟去年7月辭任。

至於同涉前年7‧1遊行嘅同案被告，仲有前民陣召集人陳皓桓、民主黨前主席胡志偉、立法會前議員梁國雄、朱凱廸，及社民連成員鄧世禮，分別承認多項「非法集結」等罪，被判囚6至12個月不等。除曾健成、鄧世禮，其餘人仍就該案或「47人泛民初選案」等案件被扣押。