政情：離港鍾劍華約滿 民研發布會減半

因乜嘢事有咁嘅轉變？話說前日係民研成立3周年，鍾庭耀喺民研Facebook上載「主席的話」，話適值民研進行半年工作檢討，今年五四之後，民研會調整新聞發布會嘅次數，原因係諗住爭取資源做網上公民教育工作。

鍾劍華早前喺社交平台貼文，透露喺上月24日已乘飛機離港前往英國，上周二透過視像會議遙距出席民研有關「政府民望、民情指數及政策評價」嘅民調發布會，又透露喺4月底約滿離開香港民研，亦轉為民研嘅榮譽顧問。

民研嘅前身係港大民意研究計劃，一直定時為政府施政、官員評分等發放調查結果，話畀人知邊個問責官員長期「墊司底」。但隨住本身係港大民研嘅總監鍾庭耀喺2019年退休離開港大，港大民研亦隨之畫上休止符，但鍾庭耀就撲水、搞眾籌另起爐灶，而民研喺同年5月4日象徵式成立，喺7月1日正式運作。