昔日東方政情：掌小組委會黨友附和 立會新丁零的突破?
李世榮加入討論增加安老宿位
立法會內務委員會早前成立咗9個研究政策事宜小組委員會，至尋日有5個研究小組委員會名單出爐，包括增加安老院舍宿位、鐵路、推動國民及國安教育、都市固體廢物及改善基層住戶居住環境事宜小組委員會，而各個會亦將展開選舉正、副主席程序。據了解大家都傾向由舊議員執掌主席職位。不過，安老院舍小組委員會或有可能由議員「新丁」李世榮執掌，若然成事，將會係首次有新議員擔任主席職位。
睇番研究政策事宜小組委員會嘅構成，委員人數上限為20名，根據立法會秘書處提交嘅文件顯示，該5個會並無超過人數上限，咁就唔需要抽籤睇彩數入會啦。
但到底正、副主席將會花落誰家呢？據了解，雖然正、副主席提名程序已經展開，但各黨派仍未協調，但估計競爭不大，應該由舊議員，甚至係提出成立研究小組委員會嘅議員擔任。
例如議員郭偉强提出研究與都市固體廢物收費、回收及循環再造相關嘅政策事宜小組委員會，估計由佢擔任主席；改善基層住戶居住環境事宜小組委員會則估計由鄭泳舜擔任；至於推動國民及國安教育小組委員會就得梁美芬及張國鈞都係舊議員，預料二選一。
陳恒鑌吹雞成立
值得留意嘅係，增加安老院舍宿位事宜小組委員會由議員陳恒鑌建議成立，但原來佢唔係想做呢個委員會主席喎。跟開交通事宜嘅陳恒鑌就話，自己都係屬意出掌鐵路事宜小組委員會主席；至於安老院舍主席，佢話可能交由其黨友、負責福利事務嘅李世榮擔任，若果最終成功當選，將會係首次由新議員擔任立法會委員會主席職務。
不過，唯一非建制嘅社福界議員狄志遠同樣加入咗呢嗰小組委員會，問番佢係咪有興趣做埋主席？狄就話順其自然喎，形容委員喺會上發聲機會較多，相反主席則發言機會唔多，未必有着數，不過做主席亦有其好處，可以訂定討論議題咁話。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
