政情：新丁唔熟書 洪雯提建議離題 蘇長榮冇撳投票掣

議員洪雯喺立法會審議《2022年撥款條例草案》全體委員會期間發言，提到想借機會向政府提供參考建議，跟住就指派發消費券刺激經濟，建議政府利用消費券作為政策工具，推動產業發展。但點知講講吓，就被主席梁君彥暫停發言，指全體委員會今次嘅辯論，只係針對相關條文是否納入或不納入，而唔應該提出新建議，有咩建議應該喺其他場合向司長提出，請你返嚟呢個辯論，好嗎？洪隨即話：「咁我搵其他機會向司長提交呢個建議。」然後就結束發言坐番低。

唔熟程序嘅新人又點止洪雯一個，話說草案去到三讀嘅時候，由於有議員要求記名投票，跟住就響起點票鐘。按程序，長達5分鐘嘅點票鐘聲一完結，隨即展開投票表決，點知選委界議員蘇長榮就未有投票，要梁君彥兩度詢問蘇係咪要投票，話佢仲未撳投票掣。梁講完之後，如夢初醒嘅蘇長榮先至撳掣投票咋。其實新會期都開始咗5個月，雖然中間有好長時間都係視像會議，但睇嚟班新人自己研究程序又好，向啲舊議員請教又好，要做番足啲功課喇！