政情：出冊數月 張超雄鬼祟離港 舉家遠走多倫多

今次張超雄靜靜雞出走，起初知情者為數有限。上月離港抵英嘅鍾劍華，日前喺Facebook發布一篇題為「逃出生天」嘅文章，好隱晦咁話佢有個朋友喺5月1日舉家離港，並剛剛抵達多倫多，已經清關。雖則話一切順利，但鍾指自己曾與對方共事，相濡以沫多年，如今大家都離開曾經生活過嘅城巿，往世界不同嘅國度走，傷別嘅感覺特別濃烈；又指加拿大也好，英國也好，並非甚麼全能創造者預設嘅天堂。直至前晚，該貼文出現張超雄嘅留言，話感謝鍾嘅關心，指雖然未能安定，但至少安全，又表示刻下嘅情況，需要更多時間照顧女兒同家人。張又強調做一個照顧者，其實並唔容易。

過往同張超雄喺議會共事嘅前議員邵家臻，亦係少數知悉張舉家出走嘅人。邵話張一日未安全抵埗，對方離港嘅消息都要保密，即使有人問起張嘅近況，都惟有支吾以對。邵憶述張坐監嗰3星期，正正係疫情最猖獗嘅日子，監房嘅防疫措施不時更改，以致鐵窗之下嘅張被調來調去，經歷5個不同監倉，無物資又無得探監，非常難捱。邵又指，張走得唔甘心，不過至少佢哋一家已平安到達多倫多，總算可以放心。

現年65歲嘅張超雄係澳門人，7歲移居香港，後來前往美國進修並入籍。於2004年當選立法會社福界議員，2008年地區直選落選，至2012年再度當選議員，並於2016年連任。2020年5月，張出席立法會內務委員會會議期間，離開自己座位走到主席台高喊「李慧琼越權」，被控一項藐視罪，今年2月4日於西九龍法院認罪，被判囚3個星期，同月24日刑滿出獄。